Gasteizko Santa Barbara plazak Araba Ekinean 2024ri hasiera eman dion Arabako Eskola Enpresen Feria hartu du urtarrilaren 29an. Bertan, Arabako Lanbide Heziketako zortzi ikastetxetako Erdi- eta Goi-Mailako Heziketa Zikloetako ikasleek 59 negozio-proiektu aurkeztu dituzte.
Eskola Enpresen Feria Ikasenpresa programaren puntu gorena da, ikasleei beren proiektuak erakusteko eta benetako bezeroen aurrean ideiak probatzeko aukera eskainiz. Ikuspegi praktiko eta hezitzaile honen xedea da ikasgelatik berrikuntza eta ekintzailetza sustatzea.
Arabako Eskola Enpresen Feriaren aurtengo edizioan parte hartu duten Lanbide Heziketako zortzi ikastetxeak honako hauek izan dira: Gamarrako Ostalaritza Eskola, Ciudad Jardín LHII, Egibide Jesús Obrero, Mendizorrotza Ostalaritza-Eskola, Mendizabala, Eraiken LHII, Egibide Nieves Cano eta Arkaute Nekazaritza LHII.
Proiektuak
Proposamen aipagarrien artean, Km0 produktuak, ogia eta glutenik gabeko opilak zituen vending makina bat aurkeztu zen, baita olioa saltzeko proiektu solidarioak ere. Gainera, mugikortasun jasangarriarekin lotutako ideia berritzaileak aztertu ziren, hala nola patineteak, auto elektrikoak eta bizikleta tolesgarriak, egunerokotasunerako soluzioekin batera, hala nola aplikazio mugikorrak eta altzari bihurgarriak.
Ekitaldi honek Araba Ekinean 2024rako jardueren hasiera ezarri du. Programa horren barruan garatzen diren bestelako ekintzak dira, adibidez, ‘Zure ideiak balio du’ lehiaketa eta Arabako ekintzaile gazteen topagune den ‘Ekin Day’ jardunaldia.
