Gasteizko Ingurugiro Gaietarako Ikastegiak (CEA) 2024ko udarako jardueren agenda aurkeztu du. Guztira 48 proposamen egingo dira ekainetik irailera bitartean Salburuako Hezeguneen Interpretazio Zentroan (Ataria) eta Olarizuko Lorategi Botanikoan.
Atariara eta Olarizuko Lorategi Botanikora hurbiltzen direnek tailer, natura-ibilbide, hitzaldi eta haurrentzako jardueretan parte hartu ahal izango dute, biodibertsitatearen ikuspegitik.
Atarian, astronomian interesa dutenek hastapen-ikastaro bat egin, oinarrizko kontzeptuak ikasi eta gaueko zerua behatu ahal izango dute. Gainera, iraileko ostegun guztietan, astronomiako adituek hitzaldiak eskainiko dituzte, eta iraileko azken asteburuan, planetarioak izar-proiekzioez gozatzeko eta zeruko gorputzei buruz ikasteko aukera emango die familiei.
Aranzadi Zientzia Elkarteko Entomologia sailak polinizatzaileei zuzendutako jarduerak antolatuko ditu, besteak beste, “Polinizatzaileak greban” erakusketa eta intsektu garrantzitsu horiek ilustratzeko PolinizArte tailerra. Horrez gain, bizikletaz ibiliko dira Salburuan eta Arabako Parke Naturaletan, miaketak Izkiko meatze-paisaietan eta uraren sekretuak argitzeko jarduerak Salburuan.
Olarizuko Lorategi Botanikoan tailerrak egingo dira Arabako basoko landareak ezagutzeko eta erabiltzeko, bai eta loreontziak eta loreontzi sortzaileak eraikitzeko ere. Interpretazio bisitak egongo dira, Europako fruitu bitxienei buruzko ibilbidea barne, eta doako bisita gidatuak uztaileko eta abuztuko igande guztietan. Abuztuko azken astean eta iraileko lehenengoan “Zinema Lorategian” zikloa egingo da, gizakiak ingurumenarekin duen interakzioari buruzko filmekin.
Arabako Natur Institutuak irteerak antolatuko ditu mikologo, botanikari eta naturalista adituekin. Olarizuko Lorategi Botanikoak uda itxiko du Eraztun Berdearen 20. oinezko itzuliarekin.
Agenda osoa udalaren webgunean kontsulta daiteke. Izen-emateak ekainaren 26tik aurrera egongo dira eskuragarri Ataria-n, gizarte etxeetan, 010 telefonoan eta udalaren webgunean.
