Euskal industriak urrats garrantzitsua eman du Lur-1 izeneko mikrosatelitearen jaurtiketarekin. Arabako Added Value Solutions konpainiak osorik garatu duen satelitea Space X konpainiaren Falcon 9 kohetean espazioratu zen abuztuaren 16an eta, lehen ahaleginean huts egin ostean, azkenean arrakastaz konektatu da enpresa garatzailearekin.
Euskal satelitearen xedea da lurraren bereizmen handiko irudiak hartzea. Bost urtez izango da lan horretan eta, ondoren, Lurraren orbitattik atera eta desegin egingo da.
Eusko labela duen satelitea
Lur-1 satelitea Euskadin osorik garatu den lehen satelitea da eta Miñaoko Teknologia Parkean kokatuta dagoen Added Value Solutions konpainiak hiru urte eman ditu bere ekoizpenean. Satelite txikia da eta 57 kilo baino ez ditu pisatzen. Hainbat bandetako antenak ditu Lurrarekin komunikatu ahal izateko eta energia eguzki panelak dituen beso zabalgarri bati esker lortuko du. Esan bezala, satelitearen zeregina Lurraren bereizmen handiko irudiak ateratzea izango da. Hasieran, Euskal Herriko geografia aztertuko du, itsasertzaren bilakaera aztertzeko, izurriteen eta ibaien kontrolak aztertzeko eta laboreen banaketa kudeatzeko, besteak beste.
Espazioaren sektoreak garrantzi handia lortu du Euskadin, bertako BPGren % 5,7 iritsi delarik. Azken datuen arabera, sektore horrek 800 milioi euro eta 5.000 lanpostu sortzen ditu. Adibidez, Lur-1 satelitearen funtsezko elementu bat, MICE gailua (bizitza baliagarriaren amaieran desorbitazioa errazten duena eta, horrela hondakin espazialak saihesten dituena), AVSk garatu du (GMVrekin lankidetzan) Europako Espazio Agentziarentzat, eta Koperniko programaren satelite guztietan egongo da.
Argazkia: SpaceX
