Jaibus Vital zerbitzuak irailean eta urrian jarraituko du lanean Arabako gazteak Eltziegoko (irailak 7), Larrazubiko (irailak 7), Alegriako (irailak 13), Murgiako (irailak 28), Aguraingo (urriak 5) eta Gesaltza Añanako (urriak 5) jaietara hurbiltzeko. Beraz, zerbitzua urriaren 5era arte luzatuko da, eta erabiltzaileek aipatu udalerri horietako ospakizunez modu seguruan gozatzeko aukera izango dute.
Aurten, Jaibus Vital zerbitzuak estaldura handitu du, guztira 58 ibilbide eta 31 jaiegun eskainiz. Erreserbak Vital Fundazioaren webgune ofizialean (www.fundacionvital.eus) egin behar dira irteera bakoitzaren aurreko eguneko 13:00ak baino lehen. Joan-etorriko txartelen prezioa 3 eurokoa da.
Autobusak ibilbide bakoitzeko lehen puntutik abiatuko dira 23:30ean. Itzulerarako, erabiltzaileek bi ordutegiren artean aukeratu ahal izango dute: goizaldeko 3:30ak edo 6:00ak.
