Donostiako Udalak, hiriko euskaltegi eta zentro homologatuekin lankidetzan, #euskaldunízate izeneko kanpaina abiarazi du, herritarrak euskara ikastera animatzeko. Izena emateko epea irailaren hasieratik dago zabalik, eta interesa dutenek edozein euskaltegi edo zentro homologatutara jo dezakete matrikula egiteko.
Ikastaroen eskaintza askotarikoa eta malgua da, hainbat pertsona-talderen beharretara egokitzeko: 16 eta 18 urte bitarteko gazteak, langabeak, gurasoak, erretiratuak eta etorkinak, besteak beste. Aurrez aurreko eskolak eta eskola telematikoak eskaintzen dira, asteko ordu gutxiko ikastaroetatik eguneko 3 eta 5 orduko programa trinkoetara bitarteko ordutegiekin.
Gainera, euskaltegiek autoikaskuntzako ikastaroak ematen jarraituko dute, ikasle bakoitzari bere lana banaka antolatzeko aukera emateko, tutoretzak edo esku-hartze saioak jasotzeko aukerarekin, online zein aurrez aurre.
Bestelako ikastaroak
Helburu zehatzetara egokitutako ikastaroek ospea hartzen jarraitzen dute. Programa horiek euskaltegiek eta Euskara Zerbitzuak elkarrekin antolatu dituzte, eta hainbat talderen komunikazio beharrei erantzuten saiatzen dira.
2024-2025 ikasturterako, Donostiako Udalak 305.000 euro bideratuko ditu ohiko ikastaroak diruz laguntzeko, eta 135.000 euro gehiago ikastaro berezietarako. Halaber, Eusko Jaurlaritzak, HABEren bitartez, euskararen A1 mailaren doakotasuna erraztu du. Maila horretan matrikulatutako ikasleek orduko 0,6 euro baino ez dituzte ordaindu beharko, eta kostua ikasturtearen amaieran itzuliko zaie, baldin eta euskaltegiak maila aitortzen badie eta gutxienez eskolen % 75era joan badira.
2024-2025 ikasturterako euskaltegi batean matrikulatzen diren pertsonek dirulaguntzak eskatu ahal izango dizkiote Euskara Zerbitzuari maiatzaren 31ra arte. Eskabidea online aurkez daiteke, www.donostia.eus eta www.donostiaeuskaraz.eus webguneetan, edo aurrez aurre, Euskara Zerbitzuaren bulegoetan (Konstituzio plaza, 2) eta Udalinforen bulegoetan (Easo, Arroka, Morlans eta Altza).
