Labe Gazte Laborategiak, gazteentzako sorkuntzari eskainitako Gasteizko udal guneak, bere denboraldi berriari hasiera eman dio. Guneak Gasteizen izango den egitarau zabala eskainiko du irailaren 11tik abenduaren 21era bitartean. Guztira, 12-30 urte bitarteko gazteek bost erakusketa, zazpi tailer, bi deialdi artistiko, prestakuntza-jardunaldiak eta horma-irudi baten diseinua izango dituzte aukeran. Programatutako jarduera guztiak doakoak izango dira.
Programazioaren helburua da ekoizpen eta sorkuntza artistiko, kultural eta ludikoa sustatzea, eta gazteen artean sareak sortzea.
Labe Gazte Laborategiak hiriko sei eragile kultural eta sozialen laguntza izango du, besteak beste, Nefer Olaizola eta Markel San Martín, Araba Click, Zirriborroak Kultur Elkartea, Espaciarte, Re-pararte eta Gauekoak. Jarduera guztiak, esan bezala, doan egingo dira, sarrera librearekin edo aldez aurretik izena emanda, ekitaldi bakoitzaren modalitatearen arabera.
Hurrengo jarduerak
“Enbor bereko ezpala” erakusketa irailaren 13an inauguratuko da eta, literatura, soinu-artea eta bideoartea bezalako baliabideak erabiliz, emakumeen sormenaren eta naturaren arteko harremana aztertzen duen obra hibrido bat aurkeztuko du. Gazte Sortzaileak deialdiaren bidez sortutako erakusketa hau publiko guztientzat zabalik egongo da.
Azaroan, “Morirte de frío” marrazki-tailerraren hainbat saio eta hitzaldia egingo dira. Bertan, gaur egun artista edo erakunde artistiko independentea izatearen errealitatea jorratuko da. Prestakuntza-jardunaldi hauek hainbat diziplinatan oinarrituko dira, hala nola marrazketa (azaroaren 9an), idazketa (azaroaren 16an), museologia eta elkarteen kudeaketa (azaroaren 23an).
Abenduan jarduera praktikoagoak eta parte-hartzaileagoak egingo dira, hala nola “Zure katilua margotu” (abenduaren 19an) eta “Zure tote bag-a margotu” (abenduaren 21ean) tailerrak, sormena eguneroko objektuak diseinatuz garatu nahi duten gazteei zuzenduta. Manga tailer aurreratua ere eskainiko da (abenduaren 20an), marrazketa, estilo eta aurpegiko adierazpen tekniketan sakontzeko.
