Iruñeko Udalak Nafarroako hiriburuko ekosistema kultural garaikidean gazteen parte-hartzea sustatzea helburu duen Taldeka programaren lehen edizioa aurkeztu du. Proiektua 15 eta 21 urte bitarteko gazteei zuzentzen zaie, eta 2024/2025 ikasturtean zehar garatuko da, kultur topagune eta esploraziorako gune gisa, inguruneko kulturara modu kritiko eta sortzailean hurbiltzeko helburuarekin.
Programa 2024ko urriaren 10etik 2025eko ekainaren 20ra arte luzatuko da. Jarduerek tokiko artistekin topaketak, erakusketak eta bestelako kultur ekitaldiak hartuko dituzte barne. Bi asteko ostegunetan egingo dira, hiru astean behin, 17:30etik 20:30era.
Parte-hartze aktiboa
Oihane McGuinness eta Karmele Oteros izango dira proiektuaren koordinatzaileak. Beraiek gidatuko dituzte jarduerak eta parte hartzen duten gazteen artean ideien trukea eta sorkuntza kolektiboa erraztuko dute. Programaren helburua, gazteak kulturara hurbiltzea ez ezik, gazteen parte-hartze aktiboa eta kultura-adierazpenak ikuspegi kolektibo batetik zalantzan jartzeko eta berrinterpretatzeko gaitasuna ere sustatzea izango da.
Topaketetan kulturaren pertzepzioari eta ulermenari buruzko eztabaidak egingo dira. Horietan, adibidez, hauek bezalako galderak planteatuko dira: “Ikusten, behatzen edo begiratzen al dugu?” eta “Ulertzen edo artatzen al dugu?”. Gainera, tokiko artistekin gutxienez hiru topaketa antolatzea aurreikusten da, lankidetza-praktikak eta esperimentazio-esperientzia kolektiboak sustatzeko. Taldekak 10-15 pertsona bitarteko bi gazte talde izango ditu, adinaren arabera banatuta: 15-17 urte bitartekoak eta 18-21 urte bitartekoak. Parte-hartzaileen hautaketa deialdi ireki baten bidez egingo da irailaren 29ra arte. Izen-emateak doan egin daitezke, Udalaren webgunean eskuragarri dagoen inprimaki baten bidez.
