Azkuna Zentroak 2024-2025 ikasturteari dagokion programazioaren zati bat aurkeztu berri du. Kultur eskaintzak 200 jarduera baino gehiago bilduko ditu eta kultur arloko 150 artista eta profesional baino gehiagok parte hartuko dute. Programazio horren helburua da artearen bidez hausnarketa kritikoa sustatzea.
Erakusketak
Denboraldi honetako erakusketa nabarmenen artean “Proyecto Lemoiz” dago, Ixone Sadabak Lemoizko Zentral Nuklearraren hondakinei buruz egindako ikerketa artistikoko lana. Erakusketa hau 2025eko urtarrilaren 30ean inauguratuko da.
Beste erakusketa garrantzitsu bat Chiharu Shiotarena izango da, artilea material nagusi gisa erabiltzen duten instalazioengatik ezaguna. Erakusketa 2025eko maiatzaren 27tik aurrera ikusi ahal izango da.
Hirugarren erakusketa handia aurtengo Velázquez saria irabazi duen Marisa González artista bilbotarrarena izango da. Erakusketa hori Reina Sofía Arte Museo Nazionalarekin lankidetzan egingo da. Gonzalezek, 70eko hamarkadaz geroztik arte sorkuntzan teknologia berriak aplikatzen aitzindaria, bere karreraren atzera begirakoa eskainiko du.
Azkuna Zentroaren zuzeneko arteen programak, “EszenAZ“ izenekoak, 20 ikuskizun baino gehiago eskainiko ditu denboraldian zehar, eta horietako sei estreinaldiak izango dira. Horien artean, Olatz de Andrésen “Denbora gorputz gisa” pieza koreografikoa nabarmentzen da. De Andrés Azkuna Zentroarekin zuzeneko harremana duen artista da eta bere lanak hasiera emango dio denboraldi berriari urriaren 17.
Prototipoak
Azkuna Zentroak “Prototipoak Bilbao. Forma Artistiko Berrien Nazioarteko Biurtekoa” hartuko du datorren urteko maiatzaren 27tik 31ra bitartean. Ekitaldi hori lengoaia artistiko garaikideen sustapenean eta hedapenean oinarrituko da eta Europa Sortzailea proiektuaren barruan egingo den sinposio batekin osatuko da
Literatura izango da protagonista “Gutun Zuria” Letren Nazioarteko Jaialdian otsailaren 25etik martxoaren 1era bitartean. Jaialdi hau bakarra da bere generoan Estatuan, eta literatura eta praktika artistiko garaikideak uztartzen dituzten proposamenak eskainiko ditu.
