Urriaren 25etik azaroaren 1era bitartean ospatuko den Donostiako Fantasiazko eta Beldurrezko Zinemaren Astearen 35. edizioak anime-a ardatz izango duen sail berri bat inauguratuko du. “Animedon – Donostiako Anime Topaketa” izena duen sail berriaren xedea da anime-a hedatzeko berariazko esparru bat eskaintzea, jaialdiaren programazioan aurretik ere leku nabarmena izan duen kultura-adierazpen bat baita.
Donostiako Fantasiazko eta Beldurrezko Zinemaren Astea japoniar animaziozaleentzako babeslekua izan ohi da, bere programan generoko izenburu esanguratsuak sartu baititu. Sail berriaren sorrerarekin, jaialdiak genero horri eskaintzen dion bere eskaintza zabaltzen du. Film luzeen proiekzioaz gain, Zinemaldiak anime-a hainbat ikuspegitatik jorratuko duten zenbait jarduera paralelo ere izango ditu, hala nola erakusketak, hitzaldiak eta tailerrak.
Streaming plataformek anime-kontsumoaren hazkundea bultzatu dute azken urteotan Mendebaldean. Azken ikerketen arabera, Mendebaldeko Z belaunaldiaren % 42k astero kontsumitzen omenditu horrelako edukiak. Animedon-ek publiko gazte hori zinema-aretoetara erakarri nahi du, Zinema Astean ohikoa dena baino gai zabalagoa jorratzen duten estreinaldiak pantaila handian aurkeztuz.
Lehen edizio honetan Animedonek Tabakalera, FNAC, EITB eta Japan Foundation bezalako erakundeen babesa izango du.
Omenaldia Akira Toriyamari
Anime-ak harreman berezia du gaur egun hain gazte ez diren Euskadiko hainbat herritarrekin. Izan ere, duela zenbait urte ohikoa zen ETBn euskarara bikoiztutako telesail japoniarrak ikusteko aukera izatea. Gazte asko genero horretako marrazki-bizidunak ikusten hazi ziren eta, horien guztien artean, Akira Toriyamaren manga-n oinarritzen den ‘Dragoi Bola’ nabarmentzen da. Toriyama aurten bertan hil da 68 urte zituelarik eta Animedon-en lehen edizioak hainbat jarduera izango dituen hilondoko omenaldia eskainiko dio.
Ekitaldi nagusia “Son Gokuk euskaraz hitz egin zuenekoa” izeneko omenaldia izango da. Ekitaldia urriaren 20an izango da, 19:00etatik aurrera, Donostiako Antzoki Zaharrean, eta omenaldia egingo zaie Dragoi Bolaren euskarazko bikoizleei. Gainera, Antzoki Zaharreko fatxada Innovart estudioko Mikel Herreroren zuzendaritza artistikoarekin apainduko da.
Toriyamari egingo zaion omenaldia bi erakusketarekin osatuko da. Lehena, “Dragoi Bola-tik infinitura. Akira Toriyamari omenaldia”, Jorge Madejónek komisariatua, Udal Liburutegiko Jarduera Aretoan egingo da eta mangakaren obra berrinterpretatzen duten 26 artistaren ilustrazioak aurkeztuko ditu. Bigarren erakusketa, “Euskadi Fantastikoa” zikloaren barruan, Liburutegi Nagusian izango da, eta Nacho Fernándezi, “Dragon Fall” parodiaren egile bilbotarrari, eskainiko zaio.
Angel Aldarondo Ondarroako errealizadore, editore eta gidoigileak diseinatu ditu Animedon-en irudi grafikoa eta bertako maskota, Tokiko.
