UPV/EHUko Arabako campuseko berrogei unibertsitate-ikaslek osatzen duten Formula Student Vitoria (FSV) lehiaketa-taldeak Bizkor EV02 ‘monoplaza’ berriarekin lehiatuko du uda honetan. Eserleku bakarreko ibilgailu berriaren debuta Silverstoneko zirkuituan egingo da uztailaren 19an eta, ondoren, Formula Studenteko nazioarteko beste lehiaketa batzuetan parte hartuko du, hala nola Castelo Blancon (Portugal) eta Montmelon (Bartzelona).
FSVk 2021ean aurkeztutako jatorrizko kontzeptuaren bilakaera da Bizkor EV02. Ibilgailu berriaren txasisa karbono-zuntzez egina dago eta material konposatuak erabiltzen ditu arintasun handiagoa lortzeko. Gainera, lau gurpiletan motor elektrikoak jarri dira trakziorako, baita kit aerodinamiko aurreratu osoa eta hobetua ere.
Ibilgailu saritua
2022an egindako proba estatikoetan, taldeak bosgarren postua lortu zuen bere kategorian Silverstoneko zirkuitu enblematikoan. Gainera, ‘Diseinu’ proban bigarren postua lortu zuen ibilbide luzeagoa duten taldeen aurrean. Epaimahaiak, marka ezaguneko teknikariez eta 1 Formulako taldeetako kideez osatua, FSVk aurkeztutako ibilgailuaren kontzeptua nabarmendu zuten.
Aurten, hautaketa-proba zorrotzak gainditu ondoren, ibilgailua hiru lehiaketatan parte hartzeko hautatua izan da: Silverstoneko ekitaldia (FS ImechE UK), uztailaren 13tik 23ra egingo dena; Castelo Brancoko lehiaketa berria (Formula Student Portugal), uztailaren 31tik abuztuaren 6ra programatua; eta Circuit de Catalunya Montmeló (Formula Student Spain) proba klasikoa, abuztuaren 6tik 12ra izango dena.
Formula Student Vitoria
Goi teknologiako monoplazaren plangintza, diseinu eta fabrikazio etapak uztartzen dituen proiektua da Formula Student Vitoria. Ikasleek modu autonomoan eta autodidaktan gauzatzen dute, eta proiektu honek lankidetza estua du tokiko industriako eragileekin. Ekimen honen helburu nagusia da parte-hartzaileei ikaskuntza praktikoko esperientzia bat eskaintzea eta etorkizunean ingeniaritzaren hainbat arlotan aplikagarriak izango diren berrikuntzak garatzeko aukera ematea.
