Irailaren 30era arte, San Telmo Museoan doako erakusketa bat izango da ikusgai. Bertan, euskal objektu tradizionalen diseinurako HAU lehiaketaren proiektu irabazlea eta proposamen nabarmenak erakusten dira. Lehiaketa horren xedea da objektu tradizional bat berrinterpretatzea gaur egungo ikuspegi baten bidez. Aurtengoa zazpigarren edizioa izan da eta gaztainak erretzeko tresna izan da aukeratutako objektua.
Aurtengo proiektu irabazlea DINAK izeneko proiektua izan da, Marta Loidi Urquizuk sortua. Epaimahaiak objektuaren alderdi funtzional eta formalen konbinazioa baloratu du, bizitza modernora egokitzea azpimarratuz. Epaimahaiaren arabera, “DINAK proiektuak trebetasunez eta sentsibilitatez uztartzen ditu objektuaren alderdi funtzionalak eta formalak. Gaztainak erretzeko tresna bizimodu modernora egokitzen jakin du, produktu moldakorra, urtarokoa ez dena eta merkatuan sartzeko bideragarria dena proposatuz. Bere memoria osoak produktua eta haren erabilerak aztertu eta deskribatzen ditu”.
Beste proiektuak
Lehen sariaz gain, Sergio Peña Tiradoren ZESTA proiektuak aipamen berezia jaso du proiekturik originalena izateagatik, eskultura-balioagatik eta pieza artistiko gisa duen funtzionaltasunagatik nabarmenduz.
Erakusketarako hautatutako beste proiektu batzuk, gaztainak erretzeko tresna sistema berriak imajinatzen eta egungo usadio eta ohituretara hurbiltzen egindako ahaleginagatik, AÏNA (Iker Leizaola), DAMAKI (Maialen Bertiz eta Marina Ibáñez), TRIKU (Aroa Ochoa, Mónica González eta Olatz Jausoro), REFRAKTARIO (Pedro Galdón), SUTAN (Alicia Comesaña eta Paula Arrilucea) eta LAKOTS (Luzaide Lizarralde, Uxue Sánchez eta María Urquiza) dira.
Erakusketa museoko espazio gastrokulturalean dago ikusgai, asteartetik igandera, 10:00etatik 20:00etara.
