Vital Fundazioak antolatutako Euskal Zinema Dokumentalaren Astearen hamargarren edizioa urriaren 21etik 25era egingo da Gasteizen. Ekitaldiak garrantzi sozial handiko bost dokumental aurkeztuko ditu, euskal zinemagileek zuzenduak, indarkeria politikoaren historiatik hasi eta Euskadiko kultura- eta kirol-ondareraino heltzen diren gaiekin. Proiekzioak Vital Fundazioa Kulturunean izango dira.
Bost dokumental
Zikloa “Los Williams“ dokumentalarekin irekiko da astelehenean, urriaren 21ean. Raul de la Fuenteren lan honek Iñaki eta Nico Williams anaien familia eta kirol historia jorratzen du. 85 minutuko film luze honek lehen pertsonan kontatzen du futbolarien ibilbidea, gurasoek Ghanatik irteteko duten borrokatik hasi eta Europako futbolean lortu duten arrakastaraino.
Urriaren 22an, Aitor González de Langaricaren “Heriotza Amaran” dokumentalaren txanda izango da. 60 minutuko dokumental honek hainbat urtez ETAren lehen biktima izan zen Begoña Urrozen kasua aztertuko du. Hala ere, hainbat historialarien ikerketa batek ondorioztatu ahal izan duenez atentatu hura Askapenerako Direktorio Iraultzaile Iberiarra (DRIL) izeneko talde batek egin zuen. Filma Giza Eskubideen Nazioarteko azken Jaialdian aurkeztu zen, eta Gaizka Fernándezek eta Manuel Aguilarrek 1960an Amarako geltokian izandako atentatuari buruz egindako ikerketa jarraitzen du.
Programazioak Pello Sarasuaren “Arantzazu. 36zm, 5 mende, herri bat” lanarekin jarraituko du urriaren 23an, Arantzazuko santutegiaren historia eta euskal eraikuntza soziokulturalean izan duen garrantzia errepasatzen dituen 70 minutuko lana. Dokumentalak frantziskotarren espiritualtasuna eta haren ondarea nabarmentzen ditu, erlijio-eremutik haratago doan ondare immaterial gisa.
Urriaren 24an, Carmen Chaplin zinegileak bere aitona izan zenaren Charles Chaplinen omenez egindako “Chaplin. Espíritu Gitano” 90 minutuko film luzea ikusi ahal izango da. Lan horretan, Elkarrizketa intimoen, artxiboko materialaren eta artista garaikideen ekarpenen bidez Chaplinen erro erromaniak aztertzen dira.
Astearen itxiera urriaren 25ean izango da, Jone Ibarretxek eta Nere Falaganek zuzendutako “Esto no es Hollywood” filmaren eskutik. ‘Ibarretxe & Co’ euskal ekoiztetxeari egindako omenaldi honek 90eko hamarkadan Euskal Herriko eta Espainiako zinemagintzan aitzindari izan ziren Ibarretxe anaien historia kontatzen du.
Proiekzio bakoitzak dokumentalaren aurkezpena eta ondoren protagonistekin solasaldi bat izango du.
