Eusko Jaurlaritzaren Kultura eta Hizkuntza Politikarako sailburu berri Ibone Bengoetxeak iragarri duenez, irailetik aurrera, euskarazko hasierako maila (A1) doakoa izango da Euskadiko euskaltegi guztietan. Neurri horren bidez euskara ez dakiten horiek euskarara gerturatzea sustatu nahi da, bereziki urrutien diren horiek. Helduen euskalduntzean, A1 maila, hasierako maila da, beste hizkuntzetan bezala, Hizkuntzetarako Europako Erreferentzia Esparru Bateratuak zehazten dituen sei mailen arabera (A1, A2, B1, B2, C1 eta C2).
Bengoetxea sailburuak azpimarratu duenez, euskara kohesio sozialerako funtsezko zutabeetako bat da eta berak zuzentzen duen sailak euskararen erabilera ikastetxeetatik at ere zabaltzeko lan egingo du. Sailburuak bere konpromisoa adierazi du euskarak lekua irabaz dezan beste gune batzuetan, hala nola lan-eremuan, kirolean, aisialdian eta ingurune digitalean. Ildo berean, Europar batasunean euskararen ofizialtasuna lortzeko erronka ere aipatu du.
Globalizazioak eta digitalizazioak eragina izan dute pertsonak harremanetan jartzeko moduan eta euskara aldaketa horietara egokitzeko moduan
Bengoetxea sailburuak azaldu duenez, globalizazioak eta digitalizazioak eragina izan dute pertsonak harremanetan jartzeko moduan eta euskara aldaketa horietara egokitzeko moduan.
Testuinguru horretan, adierazi du erronka dela hizkuntza ingurune profesionalean eta beste eremu pribatu batzuetan integratzea, administrazio publikoaren esparrutik harago; izan ere, esparru horretan hizkuntza erabiltzea sustatzen duten dekretuak aplikatzen dira.
Kulturari eta arteari dagokionez, Bengoetxeak ziurtatu du Kultura eta Hizkuntza Politika Sailak lanean jarraituko duela “sortzaile eta artistentzako berariazko fiskalitatea lortzeko”.
