![Gasteizko gizarte-etxeen eskaintza 2024-25 ikasturterako](https://i0.wp.com/www.gazteberri.eus/wp-content/uploads/2024/07/02-Argazkia-Centros-Civicos.jpg?fit=800%2C600&ssl=1)
Gasteizko gizarte-etxeen sareak jarduera-eskaintza zabala antolatu du 2024-25 ikasturterako. Uztailaren 12tik zabalik da eskaintzen diren 39.147 plaza eskuratzeko zozketan izena emateko aukera. Guztira, 572 jarduera programatu dira, 2.574 taldetan banatuta. Izena emateko epea irailaren 4an amaituko da.
Aurreko ikasturtearekin alderatuta, 1.248 plaza gehiago eskainiko dira. Jarduerak hiriko auzo guztietan zehar egongo dira banatuta, ordutegi zabalekin eta askotariko aukerekin, tartean kirol espezialitate berriak eta euskarazko eskaintza handiagoarekin. Prezioak merke mantenduko dira, % 40ko beherapenarekin udal kirol instalazioetako abonatuentzat eta % 15eko murrizketarekin langabezian dauden pertsonentzat.
Zozketa
Besteak beste, kirol-, kultura-, gizarte- eta osasun-ikastaroak hartzen dituzten jarduera gehienak zozketa informatizatu baten bidez esleituko dira, eskaera handia delako. Izen-emateak udalaren webgunearen bidez egin daitezke, 010 telefonora deituz, eta aurrez aurre edozein gizarte etxe, kirol instalazio, herritarrentzako arreta bulego edo autotramitazio bulegoetan. Zozketa irailaren 5ean egingo da, 11:00etan. Euskara ikastaroek eta kirol eta kultur jarduera batzuek izena emateko sistema mantenduko dute, iritsitako ordenaren arabera.
Kirol-eskaintza da ugariena, 22.666 plazarekin, aurreko denboraldian baino 531 gehiago, 860 ikastarotan eta 90 jarduera-motatan banatuta. Berrikuntzen artean pilates hastapenak, zirkuitu funtzionalak eta hitt-a daude. Gainera, pasa den urtearen hasieran hasi zen aniztasun funtzionala duten 6-13 urte bitarteko haurrei laguntzeko programak aurrera jarraitzen du eta euskarazko programazio elebiduna handituko da.
Osasun publikoaren eremuan, 742 plaza guztira, emozioak kudeatzeko tailerren kopuruak gora egin du eta nutrizionista bat gehitu da haurrentzako sukaldaritza-tailerretarako.
Euskarazko jarduerak
Euskarazko jarduerek 888 plaza eskainiko dituzte, eta horietatik 618 gurasoentzat izango dira. 55 urtetik gorakoentzako, atzerritarrentzako eta merkataritza- eta ostalaritza-sektoreko langileentzako ikastaroak ere izango dira.
Kultur eskaintzak askotariko ikastaroak eskaintzen ditu, praktika artistikoaren hastapenetatik hasi eta adituek emandako dibulgazio-tailerretaraino. 13.600 plaza inguru eskainiko dira, sare sozialetarako edukiak sortzeko ikastaroak eta euskarazko magia eta idazketa tailerrak. Ikastaro horien % 30,8 euskaraz izango dira, eta ehuneko hori % 78,9ra igotzen da haurrentzako jardueren kasuan.
Gizarte-sustapeneko jarduerek 1.450 plaza sortuko dituzte hiruhileko bakoitzean. Helduentzat, ongizate pertsonaleko jarduerak planifikatu dira, eta adinekoentzat, BIZAN sareko programazioaz gain, ikastaroak izango dira gizarte-etxeetan. 11 urte arteko haurrentzako ludotekek eta ludoklubek 2.074 plaza eskainiko dituzte, 123 txandatan banatuta.
Informazio gehiagorako sakatu hemen.