Urriaren 17tik abenduaren 15era bitartean egingo den Gasteizko Nazioarteko Antzerki Jaialdiaren 49. edizioak 37 ikuskizun biltzen dituen programazioa izango du. Principal Antzokia berrituko denez, antzezlanak hiriko beste udal-antzoki batzuen artean banatuko dira, hala nola Félix Petite antzokia, Jesús Ibáñez de Matauco antzokia, Federico García Lorca antzokia eta ohikoak ez diren beste espazio batzuk.
Jaialdian Juan Diego Botto, Malena Alterio, Pedro Casablanc eta Ane Gabarain aktore ezagunek hartuko dute parte, besteak beste. Beren lanak aurkeztuko dituzten zuzendari eta antzerkigileen artean, Sergio Peris Mencheta, Andrés Lima, Ana Zamora eta Daniel Verones nabarmentzen dira. Guztira, Argentina, Uruguai, Frantzia, Eslovenia, Italia eta Norvegiatik etorritako nazioarteko sei ikuskizun eta hiru estreinaldi izango dira.
Gainera, jaialdiak tokiko eszenaren aldeko apustuari eusten dio, 18 euskal proposamenekin, hau da, programazioaren ia % 50arekin. Generoei dagokienez, sei ikuskizun izango dira euskaraz, bost dantza eta beste lengoaia batzuk, eta zortzi proposamen familientzat eta haurrentzat.
Programazioa
Programatuta dauden 37 ikuskizunetatik Felix Petite Antzokiak 18 hartuko ditu, eta Jesús Ibáñez de Matauco eta Federico García Lorca antzokiek 10 ikuskizun hartuko dituzte bien artean. Horiez gain, bederatzi antzezpen egingo dira ohikoak ez diren espazioetan. Jaialdiaren atal garrantzitsuenetako bat Off Lokal 2024 da, non bertako konpainiek sortutako pieza eszeniko argitaragabeak berreskuratzen diren. Atal hori hiru etapatan garatuko da hiriko hainbat gunetan.
Programazio ofizialetik kanpo jaialdiak zenbait jarduera osagarri ere eskainiko ditu Antzerkia zabaltzen atalean: haurtxoen proiektua, Atalak programa, talde artistikoekiko topaketak eta entzuteko edo ikusteko desgaitasuna duten pertsonentzako funtzio irisgarriak. Ikuskizunetarako sarrerak jada eros daitezke Principal Antzokiko leihatilan.
Programazioari buruzko informazio zehatza jaialdiaren katalogoan eta www.principalantzokia.org web orri ofizialean kontsulta daiteke.
