Nafarroako Gazteriaren Institutuak gazte informazioko korrespontsalen programa Nafarroa osora zabalduko duela iragarri du. Iragarpena Lizarrako María Vicuña Gazteriaren Etxean egin da, 2023-24 ikasturtean gazte informazioko korrespontsal gisa aritu diren 18 gazteei egindako aintzatespen-ekitaldian.
Ekainaren 14an egin den ekitaldi horretan, gazte-korrespontsalen programaren bigarren edizioa aurkeztu da. Programa hori udazkenean hasiko da, eta aukera emango dio Gazte Informaziorako Nafarroako Sareari atxikitako gazte-informazioko zerbitzuak dituen edozein udalerriri sartzeko. Ildo horretan, Nafarroako Gazteriaren Institutua lanean ari da programaren irismena zabaltzeko, eta gazte gehiagok parte hartzeko eta prestakuntza-esperientzia horretaz baliatzeko aukera izan dezaten, korrespontsalen sarea indartzeko eta informazio garrantzitsua gazte guztiengana modu eraginkorrean iristen dela bermatzeko.
Lizarran egindako ekitaldian pasa den ikasturtean gazte informazioko korrespontsal gisa aritu diren 18 gazteen lana aitortu da. Iara Arambilet, Yasmin Chidmi, Diego Díaz, Mónica Echegoyen, Naroa Esquíroz, Almudena Garrués, Daniel Jurío, Ainara Laínez, Valentina Avril Liñeira, Judith Lop, Markel Martínez, Desirée Molero, Firas Mohammed, Iñaki Paternain, Maider San Martín, Hanae Sellam, Irati Villanueva eta Ainara Wendler izan dira aintzatespena jaso duten gazteak. Korrespontsal bakoitzak 300 euro eta diploma bat jaso ditu eta, gainera, Europar Gazte Txartelak antolatzen dituen jardueretarako doako sarrera izango dute.
