Gasteizko Udalak eta Arabako Foru Aldundiak antolatzen duten ‘Gazte Sortzaileak’ bekarako proiektuak aurkezteko epea uztailaren 15ean amaituko da. Beka kezka artistikoak dituzten 16-35 urte bitarteko gazteei zuzentzen zaie eta euskarazko sorkuntza sustatzea du helburu.
Gazte Sortzaileak deialdiaren xedea da euskarazko kultur programazioan eragitea, gazteek gazteentzat sortutako jardueren bidez, ahozkotasunean oinarritutako sorkuntzan arreta berezia jarriz. Gainera, gazteei beren sormena garatzeko aukera guneak ere eskaini nahi zaizkie.
Beka Araban bizi diren 16 eta 35 urte bitarteko gazteei zuzenduta dago. Hautatuek 4.000 eurorainoko laguntza jasoko dute beren ideia artistikoak gauzatzeko. Gainera, tutoretza profesionala izateko aukera ere izango dute beren proiektuaren esparruan.
Euskara eta ahozkotasuna
Aurkeztutako proiektuek ahozkotasunari estu lotuta egon behar dute, hau da, euskarazko ahozko adierazpenak izan behar du proiektuaren muina. Proposamenak banakakoak zein taldekoak izan daitezke, eta hainbat diziplina biltzen dituzte, hala nola antzerkia, bakarrizketak, poesia errezitaldiak, musika, bertsolaritza, ikus-entzunezkoak, performance-a edo genero horien arteko edozein hibridazio mota.
Deialdia bi kategoriatan banatuta dago adinaren arabera:
- 1. kategorian 16 eta 24 urte bitarteko gazteek parte hartuko dute,
- 2. kategorian, berriz, 25 eta 35 urte bitartekoek.
Hautagaitzak 2024ko uztailaren 15era arte aurkez daitezke. Proiektuak aurrez aurre aurkez daitezke Gasteizko Udaleko Erregistroan, Herritarrei Arreta emateko edozein bulegotan, aldez aurretik hitzordua eskatuta, edo Gasteizko Udaleko Erregistro Elektronikoan.
