Irakurketa: 2 minutu
Civivox San Jorgek UrtarriJazz jaialdiaren edizio berri bat hartuko du urtarrilaren 10etik 31ra bitartean. Udalak eta Civivox sareak antolatzen duten jaialdiaren aurtengo edizioaren barruan zazpi kontzertu, bi hitzaldi eta haurrentzako musika-antzerki emanaldi bat programatu dira, swing tradizionaletik heavy metalarekin fusioak sortzen dituzten proposamenekin.
UrtarriJazz
The Old School Quartet-ek inauguratuko du jaialdia urtarrilaren 10ean New Orleansetik Chicagorainoko musika bidaia batekin, Big Kick Eskolako swing dantzariek lagunduta. Kontrastea hurrengo egunean iritsiko da, urtarrilaren 11n, Satza Soriazu Quartet taldeak Megadeth taldearen ‘Rust in Peace’ albumaren jazz bertsio berezia aurkeztuko baitu, thrash metalaren riff-ak jazz hizkuntzara egokituz.
Programazioak Esencia Jazz-ekin jarraituko du, bossa nova, blues eta funk estiloak uztartzen dituen nafar musikarien bandak urtarrilaren 17an eskainiko duen emanaldiarekin. Asteburua Estela Julia Jazz Quartet-en emanaldiak osatuko du hilaren 18an, berezko konposizioak jazz estandarrekin eta latinoamerikar musikarekin uztartuz.
Javier López Jaso akordeoilariak ‘Inmarcesible’ aurkeztuko du urtarrilaren 24an, euskal melodia tradizionalak jazz modernoarekin uztartuz. Javier Brunak jarraituko dio hilaren 25ean bere ‘Sambay’ albumarekin, jazza flamenkoarekin eta brasildar erritmoekin nahasten duena.
Kontzertu zikloa Move taldeak itxiko du urtarrilaren 31n ‘Momentum’ proiektu berriarekin, taldekako inprobisazioan oinarritua.
Jarduera osagarriak
Jaialdia bi hitzaldirekin osatuko da. Lehenengoa urtarrilaren 14an izango da eta, bertan, Pachi Tapizek Billie Holiday handiaren bizitzan sakonduko du. Bigarren hitzaldia urtarrilaren 29an izango da eta bertaratzen direnek jazz musikak zineman izan dituen agerpen nagusiak ezagutzeko aukera izango dute Armónica Le Whisky-ren eskutik.
Bi hitzaldi horiez gain, urtarrilaren 19an bereziki haurrei zuzendutako ‘For + Jazz’ antzerki musikala eskainiko du Xarop Teatre-k.
Jarduera guztiak 19:30ean izango dira Civivox San Jorgen, haurrentzako antzerkia izan ezik, 12:30ean programatua dagoena. Kontzertuak eta hitzaldiak doakoak dira, eta haurrentzako ikuskizunerako sarrerak 3 euroren truke erosi ahal izango dira. Edozein jardueratan parte hartzeko aurretiko izen-ematea beharrezkoa da 010aren, Civivox sarearen edo www.pamplonaescultura.es webgunearen bidez.
Argazkia: Shutterstock
Advertisements
