Bilboko Udalak “Metrominutua bizikletan” aurkeztu du, hiriko gune nagusiak eta bizikletako mugikortasuna errazteko distantziak nabarmentzen dituen mapa informatiboa. Ekimen honen xedea da hiri-ingurunean garraio jasangarria eta osasungarria sustatzea, Bilboko hainbat zonalde orduko 25 kilometroko batez besteko abiaduran zeharkatzeko aurreikusitako denborei buruzko informazioa emanez.
Mapak, besteak beste, Peñascal, Zorrozaurre, Elorrieta, Arangoiti, Artxanda parkea, Arabella, Otxarkoaga, Ibaieder parkea eta Torreurizar auzoak jasotzen ditu hiriaren mugatzat. Helmuga horietara bizikletaz 3 eta 15 minutu arteko ibilbideetan hel daiteke. Gainera, mapak garraio publikoarekiko intermodalitatea eta igogailuen erabilera ere jasotzen ditu. Igogailu horiek funtsezkoak dira leku garaiagoetan edo urrunagoetan desplazamendua errazteko.
“Metrominutua bizikletan” ekimenak herritarrak animatu nahi ditu bizikletaren alde egin dezaten. Ekimenak Bilbaobizi eta Bizkaibizi bizikleta elektrikoak mailegatzeko zerbitzu publikoen laguntza du, baita Bizikletaren aldeko Hirien Sarea eta Ciudades que Caminan elkarteena ere.
Bizikletaren Aldeko Hirien Sareak azpimarratu du ibilgailu hori hirietan lehentasunezko garraio bihurtu behar dela, eta bizi-kalitatea hobetzeko, kutsadura akustikoa murrizteko eta hiriko airea hobetzeko egiten duen lana nabarmendu du.
