Vital Fundazioak datorren ikasturterako Erasmus+ programarako beka deialdi berri bat irekiko du datorren maiatzaren 30ean. Bekak 1.200 eurorainokoak izan daitezke eta, Araban egoitza izanik, Estatuko unibertsitateren batean matrikulatuta dauden eta Europar Batasuneko kide diren herrialdeetan truke-programetan onartuta dauden ikasleei zuzenduta daude.
Esan bezala, deialdia maiatzaren 30etik ekainaren 30era arte egongo da zabalik, eta eskaerak www.fundacionvital.eus webgunearen bidez egin ahal izango dira. Beka horiek jasotzeko, honako baldintza hauek bete behar dira:
- Gradu-ikasketetan matrikulatuta egotea
- 2022ko urtarrilaren 1a baino lehen Araban erroldatuta egotea
- Europar Batasuneko herrialde kide batera joatea.
Beka horietan ez dira sartzen graduondoko, masterreko edo doktoregoko programak. Hortaz, bakarrik graduko unibertsitate-titulu ofizial bat lortzeko ikasketak burutzen ari diren ikasleek eskatu ahal izango dute beka.
Esleitutako aurrekontua onuradunen artean banatuko da, helmuga den unibertsitateko egonaldiaren iraupenaren arabera. Ikasturte osoa atzerrian egiten duten horiek 1.200 euro jaso ahal izango dituzte gehienez, eta lau eta sei hilabete bitartean dauden ikasleek 700 euro. Egonaldi laburragoak egiten dituzten ikasleek 120 euro jaso ahal izango dituzte. Esleitutako egonaldirako luzapenak ez dira aintzat hartuko.
Bestalde, beka gehigarriak emango zaizkie beren familietan behar ekonomikoak dituzten ikasleei. Horrelako kasuetan ikasleek beka arrunten zenbatekoaren bikoitza jaso ahal izango dute. Horretarako, eskatzaileek justifikazio-agiriak aurkeztu beharko dituzte, eta batzorde bat arduratuko da kasu bakoitza banan-banan aztertzeaz.
Beka bat eskatzeko, interesdunek online bete beharko dute eskabide-inprimakia, Vital Fundazioaren webgunearen bidez, eta eskatutako ziurtagiriak bidali beharko dituzte becas@fundacionvital.eus helbide elektronikora. Eskabideak uztailaren amaierarako ebaztea espero da, eta kontsultak irailaren 30era arte egin ahal izango dira.
